Good book, good book, God knows what?

فالدنيا كلها ملخبطة على بعضها..وخريطة العالم كلها بتتغير..!
هل أكتب عن التحالفات القديمة التى تحولت لعداوات جديدة؛.. وللّا عن الدول التى تنادى بالحرية والديموقراطية.. فأصبحت فاشية إستعمارية.. !
أكتب عن أمريكا اللى عايزة تلتهم جرينلاند ؛وللّا عن روسيا اللى عايزة فى المقابل أوكرانيا كلها بأراضيها وشعبها وسلطاتها وبابا غنوجها..؟!
أكتب عن أوروبا وأمريكا اللى وقعوا فى بعض؛ وللّا عن الحروب اللى شغالة بالوكالة فى منطقتنا العربية فى السودان وليبيا واليمن والصومال وسوريا.. ومؤامرات الأشقاء اللى أصبحوا ألعن من الأعداء..؟!
وللا أكتب عن البلاوى اللى حصلت فى كأس الأمم بالمغرب.. التى حولت لعبة كرة القدم الجميلة من الساحرة المستديرة إلى “الساحرة الشريرة”..؟
بصراحة نفسى أكتب عن كل هذه البلاوى؛لكن مامنعنى هو أن مايحدث فى منطقتنا وفى العالم كله الآن لايحتاج لتحليل سياسى..دا محتاج لتحليل سكر وضغط..وأنا مش ناقص ..لامؤاخذة..!
# بالمناسبة.. أنجبت منذ أيام عجوز أثيوبية ولدا وهى فى السادسة والسبعين من عمرها..!
يعنى كل اللى بيحصل فى العالم الآن من بلاوى جايز.. بدليل خلف العجايز..!

# الكلام دا كتبته من واحد وتلاتين سنة .. بالتحديد فى مارس عام 1995: بعض الدول العربية تستحق عن جدارة الجايزة الأولى فى بطولة العالم للجرى..نحو إسرائيل..!
# شيلنى وأشيلك..!
الداهية السياسى سيرجي لافروف وزير خارجية روسيا قالها بصريح العبارة:لا إحنا ولا الصين عايزين جرينلاند..وواشنطن عارفة كدا..!.
يعنى بالمختصر المفيد روسيا بتقول لترامب سكتك خضرا ياهندزة.. ادخل برجلك اليمين وبرطع فى جرينلاند ؛فالطريق مفروش لك بقدونس وكزبرة..!
واضح إن روسيا بتلعب على كبير قوى على طريقة “شيلنى وأشيلك”..!
هاتوحشنا يا أخ زيلينسكى..!!
فأوكرانيا هاتروح فى الوبا زى ماراحت هنادى ياأماااااى..!

# يبدو إن الكابتن “رضا” ليس له من إسمه نصيب..!!
فبسلامته مش راضى عن أى حاجة وكل حاجة.. واليومين دول شغال هجوم على منتخبنا الوطنى لكرة القدم ومديره الفنى بعد نكسة كأس الأمم..وعنده حق طبعا ..
لكن السؤال هو: طيب وبسلامتك إنت قدمت إيه للكورة..؟!
دا أنت لما كنت مديرا فنيا لفريق طنطا كان الفريق أول الهابطين من الدورى..!
وأنا بعينى اللى هاياكلهم الدود شفتك وسمعتك صوت وصورة وإنت بتلطم وتولول، وبتصرخ على فريقك : “يالهوى..يالهوى.. دول حتى مش عارفين يباصوا الكورة”..!!
ياعم رضا والنبى لايمها شوية مش ناقصة حضرتك.. إحنا فينا اللى مكفينا ..!
يعنى لا تعايره ولا يعايرك..فالهم طايلك وطايله..!