# فريق “كفتة” من غير طحينة ولا بابا غنوج..!
عاوزين إيه من فريق قال عنه مدربه بعضمة لسانه إنه كله على بعضه إتنين لعيب وربع ..؟!
بل إن الخلوق محمد صلاح زاد من الشعر بيتا مؤكدا على الملأ إن الفريق ،بعد مالعب فى كأس الأمم الأفريقية، بقى “تلات إرباع” بس..!!
ومنعه أدبه من أن يقول أن الفريق كله تايه ومش عارف راسه من رجليه لإنه بيلعب من غير أى خطة..ولا يحزنون..!
أنا شخصيا شايف إن الفريق فعلا تلات إرباع ، زى ما قال صلاح،لكن تلات إرباع كفتة وطرب فى ربع رغيف ؛ من غير سلطة طحينة ولا حتى بابا غنوج..!
منكم لله..
# ياجماعة ..صدقونى منتخبنا الوطنى لكرة القدم بحالته دى مع المدير الفنى ده ماينفعش ينافس فى أى بطولة لا كاس عالم ولاحتى كاس العذاب والضنا..!
دا لو لعب فى كاس العالم ها يفضحنا فضيحة اللحمة البتلو فى سوق الجمعة..!
عموما أنا قلتها من زمان إن خطة ” بركة دعا الوالدين” اللى بيلعب بها مدرب المنتخب دى ماتجيبش بطولات أبدا.. دى ما بتجبش غير ضغط وسكر وشلل رعاش والعياذ بالله..!
# ديموقراطية مهلبية بطشة الملوخية..!
عيب قوى إن العالم كله فى أمريكا وأوروبا والهند والسند والبلاد اللى بتركب الأفيال يشنعوا على “الحاج أبو حنان “اللطيف الظريف الفرفوش ويتهموه بالفاشية والديكتاتورية..!
فاشية إيه وديكتاتورية إيه ..؟!
ياجماعة عيب.. دا الراجل قايد صوابعه شمع علشان يخترع لكم ديموقراطية من نوع جديد لنج تاكلوا صوابعكم وراها ..ديموقراطية بالمهلبية وطشة الملوخية.. هاتخلى الناس فى العالم كله مصارينها سايبة على بعضها ..!
وخدوا بقى “التقيلة”..فالراجل ،بعد ما يخترع النوع الجديد ده، مش محتاج أبدا لجايزة نوبل ؛ دا هاياخد اللى أجمد منها بكتير.. هاياخد.. “تاج الجزيرة”..مش تاج جزيرة جرينلاند طبعا.. لا..دا تاج الجزيرة بتاع مرزوق العتقى..السلطااااااااانية..!!
# صوت مصر مين اللى بتقولوا لنا إدعوا لها..؟!
أولا .. دى عمرها ماكانت صوت مصر..فصوت مصر لا بتشرب.. ولا بتضرب إيشى أبيض وإيشى بنى..!
وبعدين إحنا مش فاضيين ندعى لصوت مصر ..لإننا مشغولين بالدعاء لمصر ذات نفسها إن ربنا يحفظها ويحميها من الوباء والغلاء ومن كيد الإشقاء قبل الأعداء.. اللهم آمين..!
# بتوع “إعلام ما قال لى وقلت له ياعوازل فلفلوا” نازلين طحن فى بعض.. وهاتك ياردح وتلقيح كلام فشر الست أم لالو والست أم تيتى..!!
طوبة على طوبة خللى العركة منصوبة..!010
