مش عارف ليه الدنيا مقلوبة بسبب ماتقيأه “بغل سرجة” مأجور من إهانات لمصر وشعبها..!
ياجماعة الخير إهدوا شوية..فربنا قال فى كتابه العزيز: ” الخيل والبغال والحمير لتركبوها”..لا لتناقشوها..!
# عندما أقول فى مقالاتى إن شعبنا المصرى “مالوش كتالوج”..فدا من باب الهزارلا أكثر..!
لكن الشعب ليه كتالوج ونص.. وتلات إربع كمان..!
و بسبب هذا الكتالوج ؛ الذى لايعرفه غير إبن البلد الأصيل الذى عاش فى الحوارى والريف ؛ قامت الدنيا ولم تقعد فى بعض الدول العربية والإسلامية بسبب دعاء خطيب العيد بحق فاطمة وأبيها وبعلها وبنيها.. فإعتقدوا أن مصر تتشيع..!
ياجماعة الخير الحكاية مش كدا أبدا..
فبوصفى سنى أصيل محب لآل البيت ،كأغلب المصريين؛ نشأت بجوار الحسين والأزهر.. كنت أصلى الفجر فى مسجد الحسين سيد الشهداء ثم أركب أول أتوبيس لأزور السيدة زينب.. أم العواجز.. رئيسة الديوان..!
وفى موسم الحج والعمرة كنا، وما زلنا، نغنى : ” فاطمة يافاطمة يابنت نبينا..إفتحى لنا الباب يافاطمة أبوكى داعينا”..!
وخد التقيلة بقى :هناك الآلآف من المدارس الحكومية بأسماء آل البيت.
وليس سرا أن أغلب المسلمين فى مصر يحتفلون ببعض أعياد الأخوة المسيحيين؛ بل ويعتبرونها أعيادا وطنية..
وبعض المسيحيين يصومون رمضان؛ و يقيمون موائد للرحمن لإفطار الصائمين..
هى دى مصر وهذه هى طبيعة شعبها المتدين الوسطى المتسامح مع الجميع.
وهذه السماحة هى التى جذبت سفراء دول أوربية عظمى للحج سنويا لحى المطرية الشعبى فى رمضان ؛وعمل محشى الكرنب والمسقعة وباقى أكلاتنا الشعبية بأيديهم للمشاركة فى أكبر مائدة إفطار فى العالم..!!
صدق اللى قال : عظيمة يامصر ياأرض النعم يامهد الحضارة يابحر الكرم.
# كنت فاكر إن الخناقات ووصلات الردح ،اللى شغالة اليومين دول بين ساكن البيت الأبيض وحلفائه الأوربيين، مجرد خناقات بين مصارين البطن اللى بتتعارك..لكن يبدو إن المسألة جد مش هزار؛ خاصة بعد أن أعطت الست ميلونى رئيسة وزراء إيطاليا ترامب درسا لن ينساه عن إحترام سيادة الدول..!
طوبة على طوبة خللى العركة منصوبة..!
# نصيحتى لغراب البين اللى بيتنبأ بإفلاس مصر؛ وعايش دور زرقاء اليمامة وشايف اللى كلنا مش شايفينه من أوضاع المنطقة.. إخرس ياعم الأمور.. نقطنا بسكاتك..!!
فإذا بليتم فأستتروا..وللّا حضرتك مش عايز تستتروا خالص ..!!
# إلحقونا: أسعار “الكوسة” إرتفعت..!
بصراحة كدا إرتفاع أسعار الخضر والفاكهة اليومين دول كوم وإرتفاع أسعار الكوسة كوم تانى..!
فالكوسة مش مجرد أكلة..دى أسلوب حياة ..فهى اللى بتفتح الأبواب والأعتاب.. فى المدارس والجامعات .. والمصالح والهيئات..!
ربنا يستر.. مش عارف هانعيش إزاى من غير كوسة..!
