اللى عاجبنى فى ترامب إن اللى فى قلبه على لسانه..!
فالراجل دوغرى ما بيخبيش حاجة خالص..ومابيضحكش على الناس بكلام البكش إياه بتاع قيم العدالة والحرية والديمقراطية الأمريكية..!
فالرجل إستعمارى أرارى ..قال أنا عاوز نفط فنزويلا ..فأستولى عليه بعد أن جرجر الرئيس المنتخب والست حرمه فى إنصاص الليالى بهدوم النوم على السجن دوغرى..!
ودلوقت عينه على بترول إيران والعراق وناوى يلتهم كوبا وجرينلاند..ويضم كندا ومش ناقص غير إنه يطالب بالهند والسند والبلاد اللى بتركب الأفيال..!
وسلم لى على الأخت “عدالة” و بنت خالتها الست “حرية”..!
# زومبة العمر..!
الأب اللى سمى إبنه ترامب..واضح إنه بيكره فلذة كبده جدا.. فقد إدى له “زومبة” عمره..!
فمعظم دول العالم تحظر تسمية المواليد بأسم “الشيطان”..!
طبعا واحد فلحوص هايقول: يعنى حضرتك بتشبه ترامب بالشيطان..دا كدا ترامب من حقه يزعل..!!
بصراحة أنا شايف إن الشيطان هو اللى من حقه يزعل..!!
# على فكرة..من حوالى تلاتين سنة قام مواطن أردنى بتسمية إبنه “إسحاق رابين” ؛ تيمنا برئيس الوزراء الإسرائيلى الأسبق..!
وقد كتبت وقتها فى نفس هذا المكان أطالب بمعاقبة الاب ؛وتنبأت بأن يشهد الأبن أياما أسود من قرن الخروب؛ وهو ما حدث بالفعل..!
فقد وقع الإبن ضحية للتنمر..وتم طرده من عمله ..حتى أضطر للهجرة لإسرائيل وحصل على الجنسية هناك ..!
وبكدا أصبح ملعونا “رسمى فهمى نظمى” ..دنيا وآخرة..!
# بتوع إعلام ماقال لى وقلت له ياعوازل فلفلوا شغالين ندب وولولة على الغلا والكوا.. وبيقولوا لنا إحمدوا ربنا إن الحكومة بتوفر لكم رغيف العيش..!
أنا شخصيا هاأحمد ربنا وها أبوس إيدى شعر ودقن ..لو إترحمنا من بتوع إعلام ما قال لى وقلت له؛ لإن معظمهم تلاميذ نجباء للفنان سعيد الأرتست ..ملك الطبلة ..!
# الأخ ” الضلالى” عاشق الأضواء والكاميرات والبلح الأمهات ؛ اللى كان فى جرة وطلع لبرا..بيقول لكم إن الإنتحار مش حرام والمنتحر ليس بكافر..!
مش عارف حضرته جاب الكلام ده منين وعاوز منه إيه..؟!
هل هى دعوة للناس للإنتحار ؛على أساس إن بسلامته جاب النتيجة من الكونترول وعرف إن المنتحر مابيروحش النار ..دا بيروح جنة عرضها السموات والأرض..؟!
يا جماعة إمنعوا الرجل ده من الظهور فى الإعلام .. فكلامه بيثير البلبلة وبيهدد الأمن والسلم الإجتماعى ؛فهو من عينة العلم الذى لاينفع والجهل الذى لا يضر..!
ياريت يشوف له شغلانة شريفة ياكل منها عيش بدلا من هذا المشى
البطال ..لامؤاخذة..!
