.
ياعالم ياهووو سايق عليكو النبى ماتسيبوش منافسات كاس العالم وسمعة مصر فى إيدين المدير الفنى للمنتخب الوطنى وحده..!
..فإختياراته للفريق ،اللى هاينافس فى البطولة والتى أعلنها منذ أيام، كلها خيار وفاقوس..!
ياجماعة الناس مش طالبين لبن العصفور .. كل اللى طالبينه إختيارات موضوعية للفريق اللى هايمثل مصر.. ومدرب وطنى لا يختار اللعيبة ولايعاملهم حسب الكيف ومزاج حضرته..!
ياريت حد يتحرك قبل ماتقع الفاس فى الراس ؛ويتفضح فريقنا ،قدام العالم كله، فضيحة اللحمة البتلو فى سوق الجمعة..!
ربنا يستر.
# قوانين عطيات وفتكات..!
مش عارف ليه إصرار ترزية القوانين ،فى كل العصور، على تفصيل قوانين الأحوال الشخصية بعيدا عن الشريعة وعلى مقاس أشخاص بعينهم..وبحجة واحدة لاتتغير : حقوق المرأة..!
وفى الآخر نكتشف إن القانون الفلانى معمول على مقاس الست “سندس” ، والقانون العلانى على مقاس الست عطيات ،والقانون الترتانى على مقاس الست فتكات.. والتعلب فات فات وفى ديله سبع لفات..!
أنا حاسس إنى بأخبط فى الحلل ..ربنا يجعل كلامى خفيفا عليهن : سندس وعطيات والست فتكات..!!
# الأزهر مش الحيطة المايلة..!
ياريت يبطلوا يتطاولوا على الأزهر..فالأزهر ليس الحيطة المايلة فى هذا البلد حتى يهاجمه زعيط ومعيط ونطاط الحيط..!
كلام قلته من قبل أكثر من مرة..لكننى أكرره هذه الأيام بالذات؛ لعل التكرار يعلم “الشطار”..!
أيوه.. مشوها “الشطار” علشان خاطرى..!!
# فنكوش الإعلام..!
أنا عاوز واحد درس بتلاتة تعريفة إعلام يقول لنا ماهى الرسالة التى يحاول “بتوع إعلام ما قال لى وقلت له ياعوازل فلفلوا” توصيلها للناس هذه الأيام..؟!
واحد بيبشر المواطنين إنهم هايحسوا بإنجازات الحكومة عام 2100..علينا وعليكم خير..!
وواحد بيوجه خطابا غريبا عجيبا بيلعب فيه على وتر الطائفية..
مش عارف إيه الهدف منه فى هذاالوقت بالذات؛ الذى نحتاج فيها لتلاحم وتكاتف كل أبناء الوطن لمواجهة التحديات المحلية والإقليمية الخطيرة المحيطة بنا..!!
كلها رسائل بلا هدف إلا بلبلة الناس وإحباطهم وبث الفرقة بين أبناء الوطن.
والله العظيم عيب إن ده يبقى حال إعلام مصر ؛ رغم وجود وزير للإعلام ورئيس مجلس أعلى للإعلام..ورئيس هيئة وطنية للإعلام..
لقد قلتها من قبل ورزقى على الله : المركب اللى فيها ريسين بتغرق ..فما بالك بتلاتة..؟!
# راقصة عاوزة تركب الترند فطالبت بإن الزواج يبقى سنتين وبس..وأهى تجربة..ياصابت ياخابت..!
ناقص تقول نعمل الجواز بالساعة زى تأجيرالبسكليتات بالضبط..والمأذون ياخد “شبشب” الزوج رهنا حتى يضمن رجوع “العجلة” فى الميعاد..!
واضح إن”الرقاصات” سابوا الدانص..وهايشتغلوا لنا فى الهجص..!
حاجة تقرف بصحيح..!
