كتبت سامية الفقى
في الزمن ده، السوشيال ميديا والموبايلات خدت جزء كبير من وقتنا، لدرجة إننا بقينا قاعدين مع أهلنا بالجسد لكن العقل في عالم تاني.
وسط زحمة الحياة والانشغالات اليومية، محتاجين نرجّع الدفء لعيلتنا ونخصص وقت حقيقي معاهم، بعيد عن الشاشات.
اللحظات اللي مع أهلنا هي اللي بتخلينا نحس بالراحة والسكينة، وهي اللي بتفضل في الذاكرة بعد سنين طويلة.
سيدنا النبي ﷺ كان خير قدوة في التعامل مع أهله، كان يشاركهم حياتهم ويهتم بأدق تفاصيلهم، وكان يقول: “خيركم خيركم لأهله، وأنا خيركم لأهلي” (رواه الترمذي).
الرحمة والمودة اللي بنقدمها لأهلنا مش بس بتقوي علاقتنا بيهم، لكنها كمان عبادة نتقرب بيها إلى الله جل جلاله.
والقرب من الأسرة هو اللي بيبني جيل سوي عنده حب ودفء يحميه من قسوة الحياة.
الوقت مع العيلة مش لازم يكون طويل، لكن لازم يكون حقيقي.
جلسة بسيطة، لعب مع الأولاد، ضحكة صادقة، مشاركة في قراءة القرآن أو حتى حديث هادئ يجمع أفراد الأسرة، كلها حاجات صغيرة لكن أثرها بيكون كبير في قلوبنا.
الأب اللي يسمع لأولاده، والأم اللي تحتضن بناتها، هيكونوا أقرب ليهم من أي حد تاني.
