بصراحة أنا شايف إن فكرة سنة الامتياز للأطباء البيطريين
ممكن تكون من أهم القرارات اللي تخدم المهنة خلال السنوات القادمة لو تم تنفيذها بالشكل الصحيح
لأننا كلنا عارفين إن الطب البيطري مهنة عملية في المقام الأول، ومهما درس الطالب داخل الكلية، يفضل الاحتكاك بالحالات الحقيقية والتعامل المباشر مع سوق العمل هو الطريق الحقيقي لاكتساب الخبرة والثقة والقدرة على اتخاذ القرار.
سنة الامتياز مش المفروض تكون مجرد سنة إضافية، لكنها فرصة حقيقية لتجهيز طبيب بيطري قادر على العمل من أول يوم بعد التخرج.
لكن نجاح التجربة محتاج رؤية متكاملة، وأهم حاجة فيها إن فرص التدريب ما تقتصرش على جهة واحدة، بل تشمل كل القطاعات المرتبطة بالمهنة، سواء القطاع الحكومي أو القطاع الخاص، من عيادات ومستشفيات بيطرية ومزارع إنتاج حيواني وداجني وشركات أدوية ولقاحات ومصانع أعلاف ومعامل ومراكز أبحاث وغيرها.
لأن التنوع ده هو اللي هيتيح للطالب يشوف الواقع الحقيقي للمهنة ويكتشف المجال اللي بيحب يشتغل فيه.
ومن وجهة نظري كمان، من المهم إن يكون للطالب حرية اختيار المسار أو المجال اللي عايز يتدرب فيه، لأن المجال اللي هيختاره بإرادته هو غالبا المجال اللي هيبني فيه مستقبله بعد كده ويكمل فيه سنوات طويلة.
والأهم من كل ده إنها تكون فرص تدريب حقيقية وليست مجرد حضور وانصراف أو استكمال أوراق
إحنا محتاجين تدريب عملي حقيقي، ومشاركة فعلية للطالب، علشان يخرج من سنة الامتياز وهو اكتسب خبرة فعلية مش مجرد شهادة إنه قضى سنة تدريب وبس.
كمان من الطبيعي إن يكون هناك مقابل أو مكافأة للطالب خلال فترة الامتياز أسوة بزملائه في باقي المهن الطبية، تقديرا للوقت والمجهود والمسؤوليات اللي بيتحملها خلال فترة التدريب.
لو قدرنا نوفر منظومة تدريب حقيقية بالشكل ده، هنوفر على الخريج سنوات من البحث عن فرص تدريب بعد التخرج، وهنختصر عليه طريق طويل من المحاولات الفردية، ونخرج طبيب بيطرى أكثر جاهزية وثقة وكفاءة وقدرة على المنافسة في سوق العمل.
ولو ده محصلش حرفياا ، يبقى انا ضد سنة الامتياز تماما ❌❌❌ لأنها تضييع وقت على الفاضى ومش هيكون ليها اى جدوى نهائى
واخيرااا ، الاستثمار الحقيقي في مستقبل المهنة يبدأ من الاستثمار في تدريب شبابها وتأهيلهم بالشكل الذي يليق بالطبيب البيطري المصري.
#سنة_الامتياز
