فبعد مابتوع “إعلام ماقال لى وقلت له ياعوازل فلفلوا” حاولوا إقناع الشعب بأكل رجلين الفراخ ؛على أساس إنها مفيدة ومغذية وكلها حنية؛ظهر لنا رئيس هيئة “قد الدنيا”، بيؤكد إنه بيموت فى هياكل الفراخ وبياكل صوابعه وراها لإنها ألذ ..ألذ..!!
وقال على الهواء مباشرة : إن هياكل الفراخ لذيذة جدا ولها فوائد غذائية متعددة..ويمكن طبخها بأكثر من طريقة..!!
وكان ناقص يقول إن هياكل الفراخ زى السكر النبات بتدور الكعوب وبتضيع الشحوب وبتجوز البنات..!!
اللى مجننى إن اللى بيتحرش بأنثى واحدة بيحاكموه ويسجنوه..أما اللى بيتحرش بالشعب كله فلا يتعرض لأى عقاب ولا حساب ولا حتى عتاب..ولا حول ولا قوة إلا بالله..!
# سيكتب التاريخ إن الرئيس ماكرون ،رئيس فرنسا العظمى، مارس رياضته اليومية بالجرى فى أزحم شوارع الأسكندرية وسط المواطنين والسيارات ..و أكل سندوتش كبدة إسكندرانى من مطعم الفلاح الشعبى وحبس ببولة آيس كريم من جيلاتى عزة..!
ياجماعة الراجل دا دمه زى العسل..لإنه مصمم ياكل ويشرب زى أى إبن بلد أصيل فى حوارى وقرى مصر..
أنا خايف فى الزيارة الجاية ياكل طعمية بالشطة وفول مدمس بالطحينة والزيت الحار ومعاهم طرشى بلدى وفحل بصل..!
ربنا يستر..!!
# كلام الوزرا محتاج ضبط زوايا..!
بدون زعل بعض الوزراء الموقرين زودوها حبتين ..شخط ونطر وتعالى وعنطزة وكلام مايطلعش لا من وزير ولاحتى غفير..!
واللى حصل الأسبوع اللى فات من 3وزراء بس مجرد عينة من وش القفص.. ومش عاوزين نخوض فى التفاصيل..!
بصراحة ..كلام الوزرا محتاج فلاتر وضبط زوايا..وبلاتين وكوندينسر بالمرة..!
# الحمير راحت فين..!
ياريت الأفندى ” إياه ” ينقطنا بسكاته..!
فكل شوية يطلع لنا بحكاية ورواية عن الحميراللى نقصت إتنين مليون حمار حتة واحدة ..حمار ينطح حمارا.. وهاتك ياكلام ولت وعجن فى الجرايد والفضائيات..!
وطبعا لازم بسلامته يطرح السؤال الصعب وهو: الحمير راحت فين..؟!
وهنا تبدأ البلبلة والتشكيك..وكأن البلد ناقصة بلبلة.. ؟!
كنت عاوز أرد عليه لكننى مش ها أرد حتى لا أقع تحت طائلة القانون بتهمة السب والقذف..!
# إيه الفوضى والهرتلة دى..؟!
إزاى إتنين طن من كتب الوزارة يتسرقوا عينى عينك من مخازن مديرية التربية والتعليم بمطروح ويتباعوا لبتاع روبابيكيا.. من غير ما أى حد يحس أو يدرى ..؟!
واضح إن مسؤول المخازن وكل اللى شافوه وسابوه متخرجين “بإمتياز مع مرتبة القرف الأولى” من..مغارة السيد على بابا..!!
