كتبت زينب يحيى
بما إننا داخلين علي عيد الفطر المبارك، وطبعاً من أهم حلويات ومعجنات العيد هي كعك العيد بجميع أنواعه، (كعك،بسكويت، بتي فور، غريبة)، فقررنا نوضح لكم في هذا التقرير مقادير مظبوطة لعمل كيلو الكعك بالمنزل خاصة بعد ارتفاع الأسعار.
مقادير كيلو الكعك
- الدقيق: كيلو دقيق فاخر (مخصص للكحك والبسكويت) يعادل 8 كوب .
- السمنة (سر الدوبان): 550 جرام سمنة سايحة (للكحك الدايب أوي) – يعادل 2 كوب ونصف بكوب الشاي.
- الحليب أو الماء: 150 مل (كوب الا ربع) “ممنوع تزودي عشان ما ينشفش”.
- السكر البودرة: معلقتان كبار مع الدقيق.
- معلقة صغيرة الخميرة.
- ريحة الكحك: ملعقة كبيرة
- السمسم: 3 ملاعق كبار (محمص نص تحميصة).
- ذرة ملح بسيطة.
طريقة تحضير الكعك
خطوة السمنة: “اقدحي” السمنة (سخنيها لحد ما تبدأ تغلي).
المواد الجافة: قلبي الدقيق مع السكر، ريحة الكحك، السمسم، ورشة الملح.
حفرة الدقيق: اعملي حفرة في نص الدقيق وانزلي بالسمنة المقدوحة (خدي بالك من إيدك) وقلبي بمعلقة خشب.
سر الصنعة (البس): بعد ما السمنة تبرد شوية، “بسي” الدقيق بالسمنة بين كفوف إيدك لمدة 15 دقيقة على الأقل.. لازم كل ذرة دقيق تتغلف بالسمنة لحد ما تبقى عجينة لينة في إيدك.
ذوبي الخميرة في الحليب الدافئ وانزلي بيها على العجينة، “لمي” العجينة بصباعك بس مش عجن.. أول ما تختفي السوائل وقفي فوراً.
التشكيل: كوريها وانقشي بالمنقاش او البصامة زي ما تحبى.
التسوية أهم أسرار النجاح
التسوية: الفرن يكون شغال قبلها بـ 10 دقائق على درجة حرارة 160 (هادية). الكحك السادة بياخد وقت أطول شوية، واللي بالعجوة بياخد حرارة 180.
النقشة: لو النقشة راحت في الفرن، يبقى الخميرة كانت كتير أو السمنة زيادة أوي أو متبسش كويس.
أقرأ أيضاً: مشروب قمر الدين بالحليب – من المشروبات الرمضانية
