هذا الكلام كتبته فى نفس هذا المكان من 6 سنين وبالتحديد فى 14 مايو من عام 2019 كتبت:
“ما يحدث الآن ليس فى صالح أى دولة من دول المنطقة..وهو حاجة من إتنين : إما إنه لصالح إسرائيل وإبتزاز دول الخليج..أو إنه لصالح إسرائيل وإبتزاز دول الخليج..!!”
أنا شخصيا شايف حاجة تالتة خالص وهو: إنه لصالح إسرائيل وإبتزاز دول الخليج ..!!
# وشهد شاهد من أهلها..!
رئيس وزراء قطر السابق حمد بن جاسم ،بعد أن راحت السكرة وجاءت الفكرة؛ طلع وقال للدنيا كلها الكلام اللى يرضى ربنا ؛ وهو أن القواعد الأمريكية لم تحفظ كرامة ولا أمن دول الخليج؛ فهى ليست لحمايتها بل لحماية إسرائيل وإبتزاز دول الخليج..!
ليت دول الخليج تعى هذا الدرس جيدا؛ فالبيت الأبيض،زى ما بأقول دايما، عمره مابينفع فى اليوم الأسود؛ فاللى متغطى بأمريكا..عريان..!
# أتمنى من دولنا الخليجية الشقيقة أن تلتزم بأقصى درجات ضبط النفس ؛وألا تردعلى الإستفزازات التى تتعرض لها الآن..ولاتستجيب لدعوات النتن ياهو للإنخراط فى الحرب..
فالهدف هو توريط دول الخليج وإفقارها.
اللهم أهلك الظالمين بالظالمين واخرجنا من بينهم سالمين.
# مش عارف أصدق مين وأكدب مين..؟!
أصدق الرئيس الإيرانى اللى بيؤكد ليل ونهار أنه لم ولن يضرب دول الخليج الشقيقة؛ وللّا أصدق الرئيس الإيرانى اللى عمال يضرب ليل ونهار بالصواريخ والمسيرات المطارات ومحطات المية والبترول والبنية الأساسية فى دول الخليج الشقيقة..؟!
أنا شخصيا مصدق شعبولا اللى قال : كداب ياخيشة ..كداب قوى..!
# ترامب يستحق جايزة نوبل..!!
مش عارف ليه بتوع جائزة نوبل محبكينها مع ترامب ومش عايزين يدوا له الجايزة..؟!
هى جت على ترامب يعنى..؟!
دى الجايزة حصل عليها من قبل مجرمو حرب برخصة..خد عندك مناحم بيجين سفاح مجزرة دير ياسين، وشيمون بيريز سفاح مذبحة قانا ،و الست “رد السجون” أون سان سوتشى زعيمة ميانمار مرتكبة مذبحة الروهينجا ضد المسلمين.. وأبى أحمد مجرم الحرب برخصة؛ الذى أشعل الحرب العرقية فى أثيوبيا، ويقود شعبه الى الهلاك؛ ويسعى إلى تعطيش الدول المجاورة.. ؟!!
• وترامب مش أقل من كل دول أبدا.. لإن معه مسوغات إستحقاقه للجايزة..فهو تخصص إختطاف وقتل قادة الدول؛ كما أنه أشعل هو و”النتن ياهووو” حربا إقليمية قد تتحول لعالمية ، والعياذ بالله، فليه ماياخدش الجايزة..؟!
ياجماعة أدوا له الجايزة.. فالجايزة أصبحت حاجة ببلاش كدا؛ ومش بعيد يوزعوها بعد كدا فى أكياس الشيبسى ونبوت الغفير وبراغيت الست..!!
محسن حسنين
