ياريت الحكومة تفرض جمارك على كلام الوزرا..اللى أحيانا بتهب منهم وبيقولوا حاجات تفطس من الضحك مش موجودة حتى فى كتاب “ماتزوقينى ياماما قوام ياماما” ..!
فالحكومة بكدا هاتضرب عصفورين بحجر واحد.. من ناحية هاتزود الموارد العامة اللى بعافية حبتين..
ومن ناحية تانية هاتخللى الوزرا يفكروا ألف مرة قبل مايتكلموا ؛وينقطونا بسكاتهم ؛ لإن الكلام من هنا ورايح بقى عليه جمرك..!
# شوية تهييس..!
إمبارح رحت أسحب معاشى من الماكينة لقيتها بتطلع لى خمستلاف رغيف عيش مضروب بعصاية..!!
رحت الأجزاخانة إشتريت دوا للضغط بخمسمية رغيف مفقع..!
عديت على مصلحة حكومية قالوا لى عايزين شهادة من إتنين موظفين مرتب كل منهما مايقلش عن ربعمية رغيف ملدن..!
دخلت البنزينة وفولّت العربية بألف رغيف طرى..وإديت العامل خمسة أرغفة بقشيش..!
رجعت البيت لقيت أم العيال عاملة لى «صينية عيش بالبشاميل».. أكلت صوابعى وراها.. حبست بعدها ب”كوباية عيش بالنعناع”.. مالهاش حل..!
إمبارح رحت أسحب معاشى من الماكينة لقيتها بتطلع لى خمستلاف رغيف عيش مضروب بعصاية..!!
عاوز أقول حاجات كتير عن العيش اللى غرقانين فى خيره .. لكن مش ها أقولها خلينى ساكت..أحسن يتقطع عيشى..!
# الى كل «خابور» إستراتيجى ،قاعد فى الطراوة على القهوة ، بيفتى عن كيفية التعامل مع الأوضاع الملخبطة اليومين دول فى المنطقة والعالم: ياريت تنقطنا بسكاتك.. الحكاية مش ناقصاك.. فالمرارة اللى حيلتى إتفقعت، والإستبن بتشاور عقلها..!!
# المصيبة السودا إن كلهم بيقولوا إن اهداف الحرب العبثية الدائرة الآن فى المنطقة هى أهداف «سامية».. و«نبيلة»..!
و أقسم بالله غير حانث إنهم كدابين برخصة.. فأهداف الحرب لاهى سامية ولا نبيلة
بل تتعارض مع كل القيم والمبادىء والعالم كله يتبرأ منها وأولهم الست ” سامية « وأختها » «نبيلة»..!
# ألإعلام..ونكتة السيستم..!
من غير زعل ..المنظومة الإعلامية الحالية بتفكرنى بالنكتة القديمة بتاعة “السيستم”..!
فواحد على نياته دخل أكبر مول لشراء قميص كاروهات..طلع الدور الأول قالوا له الكاروهات فى الدور التانى..وطلع التانى قالوا له فى التالت، وهكذا حتى وصل للدورالأخير ..فوجد مدير المول يقول له مبتسما: للأسف يافندم إحنا ماعندناش قمصان كاروهات خالص..لكن إيه رأى حضرتك فى السيستم..؟!
بايخة مش كدا..؟!
# حرامية برخصة..!
مش عارف ليه الناس مستغربة من اللى قاله الحارس الخاص للنتن ياهو عن سارة زوجة النتن من أنها بتسرق أى حاجة مهما كانت تافهة حتى فوط الإيد..وإنها حرامية أرارية والسرقة فى دمها..!
ياجماعة دا جوزها زعيم أكبرعصابة فى العالم..سارقين بلد بحاله..مستغربين إنها تسرق شوية فوط وشوك وسكاكين..؟!
يعنى بالبلدى كدا: واحدة جوزها إرهابى ومجرم حرب برخصة ها تطلع إيه يعنى..دكتورة أسنان..؟!
