ليها حق طبعا شركات الأدوية تعمل فينا كل ما بدالها..!!
من حقها ترفع الأسعار كل ساعة زى ماهى عاوزة .. ومن حقها تخفى معظم الأدوية لتظهر بعد كدا فى السوق السودا بعشرة أضعاف سعرها.. ومن حقها تقلل كمية الدوا وتخنصر من المادة الفعالة..!!
فمن أمن العقاب أساء الأدب.. فوزارة الصحة والاجهزة الرقابية نايمة فى سابع نومة وعاملة نفسها من بنها.. وسايبة شركات الأدوية دون حساب أو عقاب أو حتى عتاب..!!
والمثل بيقول: يافرعون إيش فرعنك ..قال مالقيتش وزير صحة يلمنى..!
# لقد طلبت من زماااااان من وزراء حكومتنا الموقرة ترك مكاتبهم المكيفة والنزول للشارع لمعرفة أوضاع الشعب اللى من المفروض أنهم بيخدموه.. لكن طبعا لا حياة لمن تنادى..!
هى عادتهم وللا هايشتروها..؟!
# ياعالم ياهووووو…أنا هاأتجنن..هى البلد فاضية لمهاترات “بتوع إعلام ماقال لى وقلت له ياعوازل فلفلوا” اللى شغالين ردح وشتائم ولعن سلسفيل جدود بعض حتى وصل الأمر الى حد الإتهام بالخيانة والعمالة..!!
يعنى عندنا وزير دولة للإعلام ومجلس أعلى للإعلام وهيئة وطنية للإعلام ..ومش قادرين يرحمونا من الإعلام دا اللى جايب لنا الضغط والسكر وحرقة الدم..؟!
إرحمونا..فالمرارة قربت تتفقع.. والإستبن اللى فى السوق كله التايواني مضروب..!
# الأبيحة ست جيرانها..!
على طريقة” الأبيحة ست جيرانها”..يقوم ساكن البيت الأبيض ،اللى عمره ما ينفع فى اليوم الأسود، بجر شكل العالم كله حتى أقرب حلفائه..ولم يسلم من لسانه حتى بابا الفاتيكان.
الراجل دا بيلعب بالنار..وهو أول من ستحترق أصابعه بها..فالردح والشتايم والخوض فى الأعراض لايمكن أبدا أن تكون لغة الحواربين قادة الدول..لكنها قد تكون لغة الحوار الوحيدة بين الست أم تيتى والست أم لالو فى حارة حلال عليك..!
# مش عارف ليه بعض العلمانيين شاغلين نفسهم بحجاب المرأة..والتأكيد ليل ونهار على أنه ليس من الدين ولابد من خلعه فورا .. ؟!
أحدهم ،وهو دكتور أمراض تناسلية، قال مستنكرا وكأنه مفتى الديار المصرية : من إمتى الحجاب كان من الدين..؟!!
عاوز أرد على كلام حضرته بس أنا مؤدب ومابتطلعش العيبة منى أبدا..!
# “الأخ” سعاد حسنى..!
الخليجى اللى أهان مصر والمصريين زعلان جدا وبيقول إنه هايقاضى كل اللى شبهوه بالفنانة سعاد حسنى..!
بصراحة عيب وألف عيب إن المصريين يشبهوا” الأخت”..آسف قصدى الأخ بسعاد حسنى..!
ف”الأخت”.. قصدى الأخ.. عمره ماكان شبه سعاد حسنى خالص.. أبسليوتلى على رأى أخونا اللمبى ..دا الخالق الناطق .. الست نادية لطفى..!!
