بعض المحافظين الجدد اللى عايزين يركبوا الترند بيقوموا اليومين دول بحملات تليفزيونية على مرافق ماتهمش المواطن البسيط فى شىء .. وهاتك ياتهديد ووعيد فى الموبايل..المدير الفلانى يترفد فورا..والمدير العلانى هاتوه لى مكتبى متعلق من رجليه..إلى آخر ذلك من الكلام اللى مايتشبعش منه ويشرح القلب الحزين..!
ياجماعة لوعايزين تشتغلوا بجد إنزلوا الأسواق الشعبية والحوارى والقرى والكفور وشوفوا الناس بتشتكى من إيه..وبطلوا الأفلام الهابطة اللى ماتقنعش طفل فى كى جى ون..لإن الناس مش ناقصة أفلام تحرق الدم.. لابتودى ولابتجيب..!
# وبعدين..إحنا فى دولة قانون ومؤسسات..إزاى محافظ أو وزير أو حتى رئيس وزراء، مع كامل إحترامى لهم جميعا ، يرفد موظفا على الهوا قدام الكاميرات بدون تحقيق ولا دياوللو..؟!
دا لو شغال فى طابونة عيش بلدى هايرفدوه بطريقة أشيك من كدا بكتير.. هايقولوا له بإبتسامة عريضة : المعلم مبسوط منك قوى وبيقول لحضرتك.. ما تجيش بكرا..!
# الطعمية ..سلعة إستفزازبة..!
للمرة الألف بأقول إن التجار الفجار، اللى هايخشوا النارحدف، هم سبب حالة الغلاء المبالغ فيها اليومين دول..
صحيح الأسعار إرتفعت قليلا؛ لكن ليست بالصورة العشوائية التى يفرضها التجار على الناس..
خد عندك أبسط أكلة وهى الفول والطعمية؛ فسعر الفول ، مازال كما هو لم يزد ؛ لكن أصحاب العربيات والمحلات رفعوا الأسعار بشكل جنونى حتى أصبحت أكلتنا الشعبية من السلع الإستفزازية..!
الناس دى لازم تتحاكم بتهمة إرهاب المواطنين ؛ وتكدير الأمن والسلم العام..!
والله ما بأهزر ؛ فالمثل بيقول: عض قلبى ولا تعض رغيفى..!!
# والله حاجة غريبة ومريبة فعلا.. فالتجار قاموا برفع أسعار كل أصناف الخضار فجأة لتصبح كلها بسعر واحد هو خمسة وتلاتين جنيها.. مش عارف ليه..؟!
خايف أسألهم ليردوا ،بكل بجاحة، إن السبب هو إغلاق مضيق هرمز وإرتفاع أسعار البترول فى الأسواق العالمية..!
هو دا اللى ناقص..!
# مش عارف أضحك وللّا أعيط وللّا ألطم..!
والله العظيم هذا حدث معى فعلا.. من كام يوم بأسأل بتاع الخضرة : ليه ياإبنى غليت سعر الجرجير والبقدونس بالشكل دا..؟!
رد على بسرعة ودون أى تفكير: هو بمزاجى ما إنت شايف الحرب اللى شغالة اليومين دول ياباشا..!
ياليلة سودا..حتى بتوع الفجل والجرجير بيلعبوا سياسة..؟!
شعب مالوش كتالوج فعلا..!
# بالمناسبة..نفسى ومنى عينى أسأل بتوع جهاز حماية المستهلك؛ اللى سايبين الأسواق تضرب تقلب، بصوت الفنانة مارى منيب: إنتى جاية تشتغلى إيه..؟!
وخايف تكون شغلتهم زى شغلة الفنان إسماعيل ياسين على المدفع..برورررووووم..!
