# هو بشكله وغباوته ووشه العكر..!
ما يقوم به الرئيس الأمريكى ترامب الآن هو ” كوبى بيست” من سيناريو الحرب العالمية الذى قام بتنفيذه هتلر.. بدون أية إضافات أو حبشتكنات..!
فهتلر كان يطبق سياسات توسعية بضم المزيد من الأراضى والثروات لألمانيا..وهو نفس ما أعلنه ترامب من أول يوم له فى البيت الأبيض ، دون أية مواربة أو خجل..بضم كندا وجرينلاند وبنما..!!
وهتلربدأ الحرب بالإستيلاء على دولتين هما النمسا وتشيكوسلوفاكيا، بكل ثرواتهما وسلطاتهما وبابا غنوجهما وسط صمت مريب من عصبة الأمم ،وهو نفس ما يسعى إليه الآن ترامب فى فنزويلا بعد خطف رئيس الجمهورية وزوجته وسط صمت الأمم المتحدة.
وهتلر..قام بغزو بولندا وهدد عدة دول بالغزو فى نفس الوقت..وهو نفس مايقوم به ترامب الآن بتهديد إيران وكولومبيا ودول اخرى وإحتلال جرينلاند وجر شكل روسيا والصين..!
صدقونى مايحدث الآن هو هو سيناريو حرب عالمية وشيكة.. بشكله وغباوته ووشه العكر بصوت الفنان الجميل الشاويش عطية..!!
ربنا يستر.
# بالمناسبة .. على الرغم من إن مادورو ماكانش بينزل لى من زور أبدا..إلا إننى مستاء جدا من خطف رئيس جمهورية دولة ذات سيادة وزوجته من غرفة نومهما..!
لكن من الواضح إن اللى كان بيحمى مادورو فى قصره المحصن شوية خونة برخصة بقيادة ثنائى الفرفشة والنعنشة الجنرال على علوكة والفيلد مارشال أشرف كخة..!
# مش عارف ليه وأنا باأتابع الحروب اللى شغالة دلوقت بين العرب ،والضرب اللى تحت الحزام و أحيانا فوق الحزام..كلما مررت من أمام مبنى الجامعة العربية أردد ماأقوله دائما عند زيارتى لمقابر الغفير: السلام عليكم دار قوم مؤمنين ..أنتم السابقون ونحن إن شاء الله بكم لاحقون..
وحدووووووووه.
# بالمناسبة.. أنا ضد الأصوات التى تطالب بإلغاء الجامعة العربية لإنها بقت عاملة زى خيال المآتة..؟!
ياجماعة .. إختشوا عيب ..جامعة عربية إيه اللى لازم تلغوها ..دى لازم تبقى موجودة ..لإنها حاجة من “ريحة المرحوم “..التضامن العربى..!
# تعليقات تسم البدن..!
# تعليقات قرائى عما كتبته الأسبوع الماضى عن حل أزمة الديون.. تعليقات تسم البدن..!!
التعليقات أكدت إن الناس مش مخنوقة من الحكومة وبس ؛ دى كمان مخنوقة من بعض الأسماء التى إقترحت الإستعانة بها للمساهمة فى الحل ؛خاصة الدكتور يوسف بطرس غالى وزير المالية الأسبقبسبب حكاية أموال المعاشات..!
سامحونى مش ها أقدر أكتب هذه التعليقات حتى لا أقع تحت طائلة القانون بتهمة السب والقذف..!
